حياتي اليوم صحيفة إلكترونية يومية
—
زمان .. كانت قلوبنا عمّار
وكان أصفر ما فينا .. خضّار
وكان الجار .. لاخوه الجار
سند .. وأمان .. وحِصن ودار
***
زمان كان التراب .. معنى
نسيج وطنى .. بيجمعنا
كنايسنا .. مساجدنا
جرس وأدان .. لوحدتنا
و صوت الفتنة .. يوجّعنا
***
زمان كانت قلوبنا براح ..
و بتساعنا
و أى مكان مالوش عنوان ..
بيجمعنا
لا كان مسرح .. و لا سينيما ..
تسلينا
بتكفينا .. ليالى الجدة
تروينا .. حكاويها
تدّورنا .. سواقيها ..
مابين الماضى .. والحاضر
تاريخ .. عامر
بأبطاله .. و ثواره اللى مازالوا
شموع لينا .. و للأجيال
***
زمان كان الإيمان .. أفعال
بدون تهليل .. بدون أشكال ..
بيهدينا
و كان .. صوت الأدان ..
هادى .. نغم شادى
من الدنيا .. يصّحينا
وكان العِشق لبلادى ..
لحد الموت .. يقوينا
وكانت .. للأغانى روح
وكان قلب البيوت .. مفتوح
و كانت .. للقبور زوار ..
عن الرحمة .. ماتستغناش
و كانت للعيون أسوار ..
على غيرها .. ما تتعداش
***
زمان عدى
و خد أجمل ما كان فينا
طيابه .. و صدق فى عينينا
و أمر سلاحنا .. فى أيدينا
فى عز النكسة و الأزمة
لا يوم جوعنا .. و لا شبعنا
و لا إتذلينا .. و خضعنا
و لا نسينا .. اللى ضّيعنا
بعزة نفسنا .. رجِّعنا
و عدينا .. و غسلنا العار
عشان كانت .. قلوبنا عمار
وفيما يلي فيديو القصيدة:
