حياتي اليوم صحيفة إلكترونية يومية
—
مثل شعبي تنصح به بعض الأمهات بناتها عندها تتخوف من كثره المال في يد الزوج
طيب لو مفيش مال زيادة ياتري ممكن يتجوز عليكي ولا لأ؟
وياتري لومال لو المال بقا كتير هيسيبك ويتجوز عليكي وهنا تقومي تسمعي كلام الناس وتخلفي نص دستة او اكتر علشان تضمني فلوسه وتواجده وميهربش
بس مع الاسف عزيزتي الزوجة الكلام ده مينفعش ابدا دلوقتي هقولك ليه… اسمعيني..
لما انتي تخلفي كتير هو مش هيساعدك في تربيتهم ولا هيطيق الصراخ والبكاء بتاع الاطفال.
كده الجو الزحمة في الاسرة وكثرة عدد افرادها بيعمل حاجة اسمها تعقيد العلاقات الاسرية وده يؤدي الي التفارق وعدم التقارب وخاصه لما بيزيد عدد أفراد الاسرة…. ولو عدد الذكور زاد عن عدد الاناث في الاسره تكثر المشاكل وتتعقد العلاقات الاسرية بين الابناء بعضهم البعض..وبينهم وبين أبائهم وبين شقيقاتهم من الاناث.
وأظهرت نتائج دراسات معينة ان زيادة عدد الافراد داخل الاسرة الواحدة يضعف العلاقات الاسرية وتزداد تعقيدا وعندما يقل عدد افرادها يكون الوئام والترابط والتماسك اكثر من التفكك وعدم التماسك الاسري.
أما انت عزيزتي الأم صحتك وشكلك واهتماماتك ووقت وجوزك اللي عاوزه تحافظي عليه فين من الساقية اللي انت بتلفي حواليها طول اليوم… لا صحة ولا اهتمام بمظهر ولا ثقافة ولاخبرة ولا اي حاجة.. اصبح دورك منحصر في التكاثر والتناسل وبعدها تزعلي وتشتكي انه عاوز يتجوز او طفشان من البيت ومنك او ساب البلد وطفش وهاجر ويبعتلك فلوس وبس.
وفي ابحاث اشارت ان كبر حجم الاسرة وزيادة فارق العمر بين الوالدين وقلة الفاصل الزمني بين الاخوة ينخفض الذكاء لدي الاطفال ومع زيادة حجم الاسرة وكبر عمر الوالد ينخفض مفهوم الذات لدي الابن.
وعموما فإن حجم الاسرة بين 4 إلى 5 افراد يكون معه افضل تكوين نفسي للطفل علي اعتبار ان حجم الاسرة هو الاب والام والاخوة والاخوات.
الاطفال لهم احتاجات مادية ونفسية وبيولوجية وليست الاطفال بالعدد بل بالعدة لتكوين اسرة ناجحه تعود علي مجتمعنا بالتماسك والتقدم والرقي.
للزوجه ان تعرف ان الرجل دائما يبحث عن علاقة غير تقليدية..مع زوجته فهل لديكي وقت وجهد بعد ما غلبتيه بالعيال ان تكوني عكس ذلك؟ مظنش!
نجاح الزواج في العلاقات الثنائية المشتركة بين الزوجين وليست حياة غابة “غالب ومغلوب”!
الزواج رسالة اجتماعية… بايديكم تجعلوها رساله سلبية او ايجابية.. والغريب ان معظم الازواج حالتهم الاقتصادية متدنية مع ذلك لدي الزوجة افكار آليه سلبيه عن فكرة ان زوجها هيطير ويتزوج غيرها وان العيال هما الحل!
طبعا العيال ضحية وانت هتكوني السبب في حرمانهم من اهم الاحتياجات.
وفي النهاية.. اقولك: لما يغلبك بأي حاجة… خلي اسلوبك الحوار ومهارات التواصل الجيد بينكم.
ابن خلدون قال مقولة حلوه في التعامل: “ان الحياة الاجتماعية تقوم علي التعامل الانساني بين الافراد اي بالتعايش والامن والراحة”.
