—
يا بشر كنتوا مسلمين أو مسيحيين
إحنا مجرد مخلوقين ولله الدين
لا تجبرنى على ديانتك ولا أجبرك على ديانتى
ولا ألومك وأقلك إنت ولا يوم تقلى لأ دا إنتى
فوقوا بقى وفوضوا أمركم لله
مخابش لحظة اللى ربه يتولاه
محدش عارف مصيره ايه
ولا علم الغيب بنطلع عليه
بس نخلص لله فى العباده
ده الدين المعاملة يا سياده
مين فينا ضامن فى الجنة ولا فى النار
كله ده بأمر الحكم الملك الجبار
فى عز أزمتك اللى بيسندك واحد نصرانى
وفى عز محنته ياخد بإيده مسلم للبر التانى
بس دول اللى عارفين ربهم بإخلاص وبيتقوه
عشان يكرمهم بحبه ورضاه فى يوم ما يقابلوه
العبره بالخواتيم ومحدش فينا عارف هيتختمله بإيه
ماهو اللى بيعيش على الشئ بيموت بيه وعليه
أصل ربنا مطلع على اللى جوانا مبيضحكش عليه
فوقوا بقى يا بنى أدمين
توبوا بجد لرب العالمين
وسيبوا الخلق للخالق
لأنه هو الحكم العادل
مش من حقك تحكم على حد وتحاسبه
كل مخلوق مسئول عن فعله قدام ربه
إوعى تسخر من عاصى لأنك بتأدى الطاعات
وتفتكر إنك أحسن منه لإرتكابه المحرمات
ربما دمعته لحظه سجوده تجعله عند ربه فى أعلى عليين
وسخريتك منه وتكبرك بطاعتك عليه تجعلك في الأسفلين
فلا يدخل الجنه من كان فى قلبه ذره من كبر
ف متحطش نفسك مكان ربنا لأنه الحكم البر
إخلص إنت بس النيه لله وإتعامل بإخلاص ووفى
ساعد غيرك لوجه الله فقط وكون الأمان ليه والدفى
ملكش دعوه ده مسلم ولا مسيحى ولا إيه كلام ملكش فيه
إحنا مخلوقات واللى كاتبه ربنا لينا إحنا مش مطلعين عليه
هقول تانى العبرة بالخواتيم ومحدش عارف خاتمته على إيه