الخميس , 28 مارس 2024

نيرة الإمام تكتب: “الجحود”!

= 1926

يا اللى إنت قلبك حديد قلب أعمى لا شايف ولاحاسس
قاعد بتتفرج على جرح غيرك من بعيد لا دارى ولا لامس

بكره تدوق من نفس الكاس والناس عنك هتتعمى
سعتها هتعرف قيمه الإحساس لما زى غيرك تترمى

يا اللى إنت الدم فى عروقك بقى ميه بارده
بكره تشكى حالك برده من القلوب الجاحده

زى ما عميت عينك عن الحق
ومقدرتش تقول للظلم ألف لا

الكأس المر اللى داقه غيرك
واصلك قريب يمكن يصحى ضميرك

مليون صرخه وصرخه مكتومه جواك وجوه كل واحد حواليك
الصوت مكتوم والضمير معدوم والخوف سيطر عليهم وعليك

طالما الكارثه اللى حصلت بعيد عنك
إنت نايم ولا فارق معاك أصلا ولا همك

أصل اللى فى المصيبه ده مش من دمك

زى غيرك يا بتزيف الحقيقه يا ساكت عشان مصلحتك
مش عايز وجع دماغ ما المدبحه طلعت مش بتاعتك

دى بس تخص واحد من نفس بلدك

تلاقيها حاجه تخص جارك ولا جارتك
والله حتى لو تخص خالك ولا أختك

بالكتير تقعد تتصعب عليهم وتقول يا عينى ويا ليلى
تطمن من بعيد وتقول لنفسك أنا كده مرتاح ضميرى

يا ناس راحت فين الإنسانيه
ليه القسوه حلت مكان الحنيه

سوء الظن والجبروت بقوا على الكل مسيطرين
الكل بقى ساخط على حاله لا حامدين ولا شاكرين

كله بقى عايش ومخبى ورا ضهره سكين للتانى
محدش فارق معاه إلا نفسه ماهو إتعود يكون أنانى

الله يرحم زمن النخوه اللى الدم فيه بقى ميه
معدش فيه أهل ولا إخوه فيه بس خلق مفتريه

الله يرحمك يا رجوله يا اللى بقيتى مجرد ذكور
طغت عليكى المصلحه والأغلبيه بتتعامل بفتور

ليه كده يا ولاد الأصول بقى شئ عادى الفجور

يا اللى إنت بقيت أعمى قلب وبصيره
زى ما بتحسن الظاهر أحسن السريره

بلاش الغل والجحود اللى مخلوش للأمان وجود
إعملوا حساب يوم هتقابلوا فيه ربنا المعبود

شاهد أيضاً

عندما يتوقف المطر … بقلم: مريم الشكيلية – سلطنة عُمان

عدد المشاهدات = 6062 عندما التقيتك أول مرة في ذاك اليوم الربيعي الهادئ على الجانب …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.