—
مابقاش معاك
الخضر لاجل يعلمك
ولا فى سفينة
نوح من الموت تنقذك
فافعل ماشئت
كل البشر بأنياب
والدنيا غاب
ومافيش صحاب
وسحاب ضباب
سرداب فيه نور
اياك سراب
دى العتمة كاسية
ع القلوب
طب تعمل ايه؟
الانسحاب
ولّا الحساب ؟
رٌد الجميل
لكل اسم بيجرحك
وابعت خطاب
بألف شكر
وتقوله فيه ان انت فٌقت
رد القلم مليون ألم
على اللى باعك وانعدم
وعلى اللى خانك
من عدم
وعلى اللى ظن
انك مباح يوم
واستباح فيك الجراح
وادهس ضميرك
فالطريق
فتت عضام
اقرب صديق
واوعى الندم
ده الوقت حان
تغيير حياتك
فالبداية تحس
فيه عدم اتزان
والقلب زان
وكأنها حالة اكتئاب
انا حاسة بيك
غمض عينيك
ركز قوى
من غير حدود
انوي انتقام
واياك تحب
انا قلبي كان
زيك كفيف
بطل كلام
انسى الضعيف
جواك جبان
افتح بيبان
الغل والحقد
اللي بان
ولما يجري
العمر بيك
هتحسه ضاع
وانت فصراع
عايش خداع
مانتش نبي
وظالم اوى
والدعوة دى
من غير حجاب
مخوفاك
وجوة نفسك
مش لاقيك
عايش ف حرب
حاسس بذنب
خايف اكيد
م الاحتضار
نفس السؤال
وده كله ليه؟
رد الاذى
وباختصار
كان اختبار
ترضى الهلاك
وتعيش شيطان …!!!
يا تموت ملاك